ബ്ലോഗിസം എന്ന പദം ബൂലോകത്തെ ഓക്സ് ഫോര്ഡ് ശബ്ദ താരാവലിയില് നിന്ന് വളരെ കഷ്ടപ്പെട്ട് തൊണ്ടി സഹിതം കണ്ടെടുത്തതാണ് പഴയ എസ് ആകൃതിയിലുള്ള കത്തിപോലെ. അതുകൊണ്ട് തന്നെ ഭൂലോകത്ത് ജീവിക്കുന്നവര്ക്കോ ജീവിച്ചു എന്ന് വാദിക്കുന്നവര്ക്കോ ഇനി ജീവിക്കാന് ആഗ്രഹിക്കുന്നവര്ക്കോ ഇതുമായി ബന്ധമില്ല. ബന്ധമില്ല എന്ന് പറഞ്ഞിട്ടും ഉണ്ടെന്നു തോന്നുന്നുവെങ്കില് അത് തികച്ചും വായനക്കാരന്റെ കുറ്റം. സിനിമാകാരുടെ ഭാഷയില് ഇത് തികച്ചും വിത്യസ്തമായ ഒരു ഭയങ്കര ന്യൂതന വിഷയം. ഇതുവരെ ഞാന് എന്ന മഹാന് എഴുതാന് മനസ്സില് കോറിയിട്ട അഥവാ ഉദ്ദേശിച്ചിട്ടുള്ള ആയിര കണക്കിനു പ്രമേയങ്ങളില് നിന്നും തീര്ത്തും വിത്യസ്തമാണ് ഈ ബ്ലോഗ് വിഷയം. അല്ലെങ്കിലും ഈ ആവിഷ്കാരത്തിന്റെ സ്വന്തം നാട്ടില് എഴുത്തുകാര്ക്ക് എന്തു കുറ്റം.
ഏതായാലും ബ്ലോഗ് ലോകം പ്രവിശാലമാണ്. എലി മാളത്തെ വെല്ലുന്ന വിശാലത. അവിടെ ഓരോരുത്തരും രാജാക്കന്മാര്, വെറും രാജാവല്ല. കിരീടം ധരിച്ച് സിംഹാസനത്തില് അഹങ്കാരപൂര്വ്വം ആസനം പൂണ്ട മഹാ രാജാവ്. ആരവിടെ എന്ന് ചോദിച്ചാല് ആയിരങ്ങള് പോയിട്ട് സ്വന്തം മകള് പത്മജ പോലും ഓടി വരാത്ത കൊട്ടാരം ഓരോ ബ്ലോഗര്മാരും സ്വന്തമാക്കി വച്ചിട്ടുണ്ട്. അതിന്റെ പട്ടയം രവീന്ദ്രന്മാരുടെ കയ്യില് നിന്ന് സംഘടിപ്പിച്ചതാണ്. എന്നാലോ ശാന്തി മഠം വില്ല സ്വന്തമാക്കി എന്നാണ് ഓരോത്തരും വിചാരപ്പെടുന്നത് പിന്നെ അഹങ്കരിക്കുന്നതും .
ഇനി ബൂലോകത്തെ വിഭവമോ ആരോട് ഞാന് ചൊല്ലേണ്ടു പരാതി. കോഴി ബിരിയാണി തരാം എന്ന് വീമ്പിളക്കി വിളമ്പി കൊടുക്കന്നത് പഴങ്കഞ്ഞി. അത് ഊതി കുടിക്കണം എന്ന് ബോര്ഡ് വക്കും , എന്തും എഴുതും ഇത് പോലെ, എന്നാല് എഴുത്തിന്റെ ആത്മ രതി അവിടെ തീരില്ല. ഒറ്റകയ്യന് ഗോവിന്ദസാമിയെ പോലെ സൌമ്യെയെ തോളിലേറ്റി ചാടി വീഴും ഓടുന്ന തീവണ്ടിയില് നിന്ന് പുറത്തേക്ക്. മാത്രമോ അതിന്നു സക്കര് ബര്ഗിന്റെ ഇമ്മിണി ബല്ല്യ ദുന്യാവ് വേറെയുണ്ടല്ലോ പ്രവിശാലം ഗള്ഫു മലയാളിയുടെ വീട് പോലെ. അവിടേക്ക് മൂട്ടില് തീ കൊളുത്തി പറത്തി വിട്ടാല് പിന്നെ എഫ് ബി അങ്ങാടിയില് കൂടി ഒരു പണിയുമില്ലാതെ അലഞ്ഞു നടക്കുന്ന ഏതെങ്കിലും വൈറ്റ് കോളര് ആടുകള് മണത്തു നോക്കി വരും. അവരുടെ നിര്ലോഭ ലൈക് കിട്ടിയാല് ബഹു ജോര് ഞാനാരാ മോന് എന്ന് മനസ്സില് വെറുതെ തോന്നും. ബേപ്പൂര് സുല്ത്താന്റെ സര്ഗശക്തിയുടെ മിന്നലാട്ടം എന്റെ (വി)കൃതിയില് ഉണ്ടെന്നു ഞാന് തന്നെ കൃഷ്ണ നായരുടെ മരണ ശേഷം നിരൂപണം നടത്തിയിട്ടുണ്ട്.
ബ്ലോഗ് ലോകത്തുള്ളവര് കേരള രാഷ്ട്രീയം പോലെ ഗ്രൂപ്പ് കളിക്കാരോന്നുമല്ല. അവര് ടുണീഷ്യ യിലെ ബൂ അസീസിനെ പോലെ ചരിത്രത്തില് സ്ഥാനം പിടിച്ചവരാണ്. മിസ്രികളെ പോലെ പതിറ്റാണ്ട് പരിചയ മുള്ള ഭരണാധികാരികളെ വെറും പതിനെട്ടു ദിനം കൊണ്ട് തോളില് മാറാപ്പു കേറ്റും. ചുളുക്കി പറഞ്ഞാല് അവര് പരസ്പരം മെയില് വഴി തര്ക്കിച്ചു അവരതിനു ചര്ച്ച എന്നോ ചാറ്റ് എന്നോ പേരിട്ടു. പിന്നെ അവര് ഒരുമിച്ചു കൂടി ചായ കുടിച്ചു,ചോറ് തിന്നു കാണും , പ്രായോജകര് ജാഗ്രതൈ , കല്യാണം വിളിച്ചും തക്കാരം നടത്തിയും മുന്നോട്ടു പോകും. പരസ്പരം പുറം ചൊറിയും അവാര്ഡ് വാങ്ങി കൊടുത്ത്, കൊടുത്ത് വാങ്ങി അതിനിടയില് ആരും കാണാതെ ഒരാള് മറ്റൊരാളെ തോണ്ടും പിന്നെ മാന്തും മാന്തിയവനെ ചവിട്ടും ചവിട്ടിയവനെ തെറിവിളിക്കും പുറത്താക്കും അവന് വേറൊരു കൂട്ടായ്മ ക്ക് രൂപം കൊടുക്കും. ഇത് ആവര്ത്തിക്കും കാരണം ചരിത്രം ഒരു ചുറ്റുകോണി യാണെന്ന് ലീഗുകാരനല്ലാത്ത ഒരു മഹാന് പറഞ്ഞു വച്ചിട്ടുണ്ട്.
ഇപ്പോള് സ്വാഭാവികമായും നിങ്ങള്ക്ക് തോന്നും ഇത് തന്നെയല്ലേ ഭൂലോകത്തും നടക്കാറുള്ളത് എന്ന് അതാണ് പണ്ടൊരു മനീഷി പറഞ്ഞത് സകല ബുദ്ധിമാന് മാരും ഒരു പോലെ ചിന്തിക്കുന്നു എന്ന്.
(ഈ പോസ്റ്റിന്നു പിന്നിലോ മുന്നിലോ ബ്ലാക്ക് മയില് പ്രവര്ത്തിച്ചിട്ടില്ല അത് കൊണ്ട് മാന ഹാനിക്ക് രണ്ടു കോടി ചോദിച്ചു കേസ് കൊടുക്കരുത്)
