ലീഗുകാര്‍ സംസ്ഥാന സമിതി ചേര്‍ന്നു ഇതേത് കാലം എന്ന് ചോദിച്ചാല്‍ ആ വാര്‍ഡിലെ കോഴികളുടെ കഷ്ട കാലം എന്ന് ദോഷൈക ദൃക്കുകള്‍ പണ്ട് പറയും. ഇപ്പോള്‍ കാലം മാറി കഥ കുറച്ചു കാലമായി മലയാള സിനിമയില്‍ പോലും മാറുന്നില്ല . സി ബി ഐ ഡയറി കുറിപ്പ് , രതി നിര്‍വേദം , അവളുടെ രാവുകള്‍ അങ്ങിനെ രണ്ടാം ഭാഗം വരും, രണ്ടാം ഭാഗം വിജയിച്ചാല്‍ മൂന്നാം ഭാഗം, അതാണ് പ്രൊഫഷനലിസം, കുറച്ചു കാലമായി ലീഗ് പ്രോഫഷനലിസത്തെ ഇരട്ട പെറ്റു കൊണ്ടിരിക്കുന്നു.
ആദം മലയെ തേടി പോവുക ഇല്ല എങ്കില്‍ മല ആദാമിനെ തിരഞ്ഞു പോവുക, അല്ല പിന്നെ. കാലം മാറിയത് നാം തിരിച്ചറിയണം, വേണെമെങ്കില്‍ പാണക്കാട്ടു നിന്ന് കോട്ടയത്തേക്ക് ഒരു ഇരുപതു വരി പാതയോ നന്നേ ചുരുങ്ങിയത് നമ്മുടെ മന്ത്രി മുറാദ് പോലെ ഒരു അഞ്ചു വരി പാതയോ ഉണ്ടാക്കാന്‍ ഇബ്രാഹിം കുഞ്ഞിനെ ഏല്‍പ്പിക്കട്ടെ.
കോടാലിയെ കോടാലി എന്ന് വിളിക്കണം, കോണ്ഗ്രസ്സില്‍ ഗ്രൂപുണ്ടായാല്‍ (?) അതിനെ ഗ്രൂപ്പ് എന്ന് തന്നെ വിളിക്കണം, അത് തൊഴിലാളി വിപ്ലവ പാര്ട്ടിയിലാനെങ്കില്‍ വിഭാഗീയത എന്ന് പേരിടാം അത് പോരിശയാക്കപ്പെട്ട മുത്ത്‌ മുസ്ലിം ലീഗില്‍ ആണെങ്കില്‍ അങ്ങിനെ വിളിച്ചാല്‍ കുരുത്ത കേടു പറ്റും നമുക്ക് അതിനെ പ്രൊഫഷനലിസം എന്ന് ഖല്‍ബില്‍ ഉറപ്പിച്ചു നാവു കൊണ്ട് വെളിവാക്കി മൊഴിയാം.
ആധുനിക ലോകത്ത് കളക്ടീവ് ലീഡര്‍ ഷിപ്‌ എന്നാണ് അതിനു പറയുക, ശത്രുക്കള്‍ ഇതിനെ വീതം വെപ്പ് എന്ന് വിളിക്കുന്നതില്‍ അതിശയമില്ല. അവര്‍ക്ക് ലീഗിനെ കുറിച്ച് ഒരു ചുക്കും അറിയില്ല. ലീഗിനെ പ്രകോപിപ്പി ച്ചാല്‍ രണ്ടല്ല അടുത്ത പ്രാവശ്യം മൂന്നു ജനറല്‍ സിക്രട്ടറിമാരെ നിയമിക്കും (കുഞ്ഞാപ്പയില്ലെങ്കില്‍) കുഞ്ഞാപ്പയുണ്ടെങ്കില്‍ അത് മതി, ആയിരം കോഴിക്കൊരു കാട.
